हास्न्याँ हौ कि रुन्याँ ,जे गर्या लै हुन्याँ

हास्न्याँ हौ कि रुन्याँ ,जे गर्या लै हुन्याँ
>>><<<
१.भाइकी बौजी इज्याइ ब्वारी ,साड़ुदाइकी साली,
मैं है छ एक् बेत अल्की , हल्का हल्का काली ।
२. निकी भणूँ कस्याँ भणूँ ,महाकी छ जाली,
शासु शसुरा हाण्णाइ झान्छे ,मैंलाई दिन्छे गाली ।
३.दिनैको दुई फिट्ट हेरः बजार तिर झाली,
कन्ज्याँ ब सट्काउछे साइबौ खल्डी हुन्छे खाली ।
४.साँङलो खुसौन्याँई रै छ सुदोइ लौन्याँ ताली ।
सुनारखि बेची रै छन्, कानैनीकी बाली ।
५.खजा गेड़ा रेल्दी छ यो, चाइन्याँ एक्केक नाली ,
धिनाली लपालप भायौ कठ्याइनोइ हात हाली ।
६.काम अर्दु त काँ हो काँ हो और लै धन्न्याँली,
कभै भाँची जौं का सैला कभै लुकाइ फाली ।
७.क्रिम पाउडर के हो के हो थोलमणो लाली ,
ऐनामि तकन्छे भौतै डिस्को फैसन वाली।
८.आँसी डोको खितेर गै छ, तल्ली गाड़ै ताली ,
रोपाड़ उदारी माइत गै छ ,पुराई कुलो ढाली ।
९. शसुरा लै दिक्की गया भण्णान उन लै खाली,
मेरो नाउ हलाउन पसी क्याकीलाई यो पाली।
१०. सेल्फी भण्योइ जुल्फी क्या हो फेसबुकैनो हाली,
कोइ भण्णाछन आहा ! भण्यो कोइ दिनाछन गाली ।
११.नौलाई पैन्ट लाउछे हेर चिरा पाड़ी खाली,
मै लागन्छे शरम् बर्ती पैन्ट दिऊँ कि टाली ?
१२.बरु खण्णू बाँजो जग्गा बरु काट्नु आली ,
इसी फूल भाड़ीको त हुना है लै माली ।
( प्रकाश पैतोलाजीका फेसबुक टाइमलाइनबाट साभार । फोटो सौजन्य- गुगल )