नवबर्षाभिनन्दन २०७७
नूतनाभिबादन विवाह बार्षिकोत्सब ४५
ओ हो,
झन्डै आधा शताब्दि समेटिएर
त्यो सुखद संयोग नै सिंगै जीबनको आधार बनेछ ।
संझन्छु,
दुई बीस पाँच बर्ष अगाडि,
लुस्सुक तिमीले यौटो औंठी दिएकी थियौ ,
खुस्सुक्क मैले त्यो स्विकारेको थिए ।
त्यसपछि,
हामी हिड्यौ त बाटो बन्यो ।
हामी बस्यौ र पो बास भयो ।
अरुलाइ हेरि नक्कल गर्दा
आफु हराउने हो कि भन्ने ठान्यौ ।
बुझ्दै गयौ,
संगसंगै हिडदै गयौ ।
कहिले बर्ष पनि अल्प भयो,
कहिलेको दिन पनि कल्प भयो ।
मायाप्रेमका बजारीकृत बिकाउ परिभाषा भन्दा पर
एक अर्काका आदर्श, आबश्यकता,प्रेय र श्रेय बन्यौ ।
जीबनयात्रामा लागेका कतिपय चोटहरुले
अरुले औंल्याउने एकाङ्की खोटहरुले ,
न कहिले रुमलियौ,
न कहिले बदलियौ ।
स्थिर सत्यले भरिएको
आफनै जमीनमा उभिइ रह्यौ ।
अहिले पनि,
कालक्रमले केही नयाँ सिकाउदैछ, सघाउदैछ।
अझै सिकाउनेछ, सधाउनेछ ।
आउ!
संगै हिडौ, संगै पुरुषार्थ गरौ ।
जीवन बिणाले सँधै नयाँ गीत गुनगुनाइ रहोस ।
र यो क्रम चलि रहोस………. चलि रहोस् ।>>>>>>
नौलो बर्ष २०७७ को पहिलो दिन
हाम्रो विवाहको ४५ सौं बार्षिकोत्सबमा
नूतनाभिबादन ।
हामी आफैंलाई,
हाम्रा सबैलाइ ।
&&&&
